【靚女唔易做】馬鞍山 KFC 女神感到好困擾

34188

近日人氣爆燈嘅馬鞍山 KFC 女神 Kathy,昨日突然係 Facebook 寫了一段千字文,內容係話爆紅令佢感到好困擾、佢都唔想紅、唔想接受訪問,只想做好呢一份工! 原文係咁寫:

一直以來
我以為只要我一直噤聲,所有事情都會過去
一開頭,我會諗,點解我呢一份工作,呢一份糧,係包埋俾人去評頭品足
種種既評論 睇完,笑吓咪算囉
幾日以來不停有人forward每一個post每段新聞俾我睇,其實我真係好困擾好困擾。
我同自己講,用新鋪既忙碌去麻醉自己,唔好俾自己去諗咁多睇咁多。
但原來,我好犯賤,我每一個post每一段留言都有去睇。
每一日返工,我會喺個腦不停諗,究竟邊一條路行返去會最快最少人,我覺得好可憐,究竟我做錯乜野要面對眼前既事?返到去我要喺所有人面前堆砌一個個笑容,因為我唔識點樣去表達,更加唔想大家去擔心我,由開鋪到今日嗰種辛苦吃力只有我地先會體會得到,發生呢件事我覺得好對唔住大家,為咗保護我,不停同我調更,好多時有咩事就叫我走先,佢地就不停幫我善後。
有記者尼到,其實我已經一早表明到我唔想接受任何訪問,只係想等事情慢慢丟淡就算。取而代之既係,我匆匆既幾句回答,可以變成今日一篇咁完整既報導。
一直都知道,網絡既影響太大,一句無心既說話,中傷可能打出尼唔須要10秒,一直都可以撐得住,直到睇到有人好確切話我係雞又話我墮胎,嗰一吓我情緒已經再控制唔到。我都有屋企人,有阿爸阿媽,究竟成件事我做錯乜野?
什麼仙氣,女神,一切一切並唔係我自封亦唔敢當,我只係一個好想努力去做好自己,做好呢一份工既人。呢幾日上咗好寶貴既一課,多謝身邊既每一個,多謝公司,無您地我唔會捱得住,Kathy一定會好俾心機去報答您地!